“أوعي تصدقي”.. قصيدة عامية جديدة للشاعر طلعت محمود عبدالمحسن

57

أوعي
تصدقي
إني لسه واقف
علي أول ناصية شارع
من قلبك
مستني
تأشيرة مرور
ويعدي عليا الدور
وأشوف نفسي
مركون بعيد
جوة حيطان قلبك
متغطي برائحة أمبارح
منتظر
عصفوره اللي سارح
اللي بيدور
علي قلبه
اللي تاه
اصله
مفطوم ع الغش
وليه ألف وش
وبجناحه
بيهدم نفس العش
اللي بنناه
من جرح السنين
أوعي
تصدقي
إني لسه
ها حارب
أمواج الدم
الحزين
واتعلق ف حبل
حبك الدبلان
و أنا عمري
ما كنت جبان
ومش ها أغرق
في بحر النسيان
واستني
أي موجة معدية
ترفعني لفوق
يمكن أفوق
واتشعلق
في سفينة نوح
ترفضني
محتاج
اطهر من آثام حبك
ترميني
علي الشط الغربي
من حلم عمري
اللي فات
و من سكات
رحت أدور علي نفسي
ما لقتش غير
حبة ذكريات

Leave A Reply

Your email address will not be published.