- ناس كتير بتدور حواليها على معنى للسعادة !!
مع ان السعادة جواهم بس راحت منهم لما فكروا يدوروا عليها .
ناس كتير بتسأل هى فين السعادة دى فى الدنيا الى عايشين فيها ؟؟
ف السعادة تسمع الكلام وتزعل وتاخد القرار وتهرب وابقوا قابلونى بقى لو لقيتوها .
ناس كتير بتنسى كرم ربنا و اللى فى اديها … مع ان الى فى اديها اكتر بكتير من اللى عينهم بتطلع عليها .
ناس كتير استكتروها على غيرهم وقالوا اشمعنا مجتش لينا … مع ان لو دخلوا فى عالم غيرهم هيحمدوا ربنا على حالهم وهيرضوا زى ما هى كدا بيها .
ناس كتيروا بيحطوا اديهم على خدهم ومستنيين الفرج لما تعدى الحلوه وتهل عليهم فيغنوا ليها … مع ان من جدَّ وجد ولو فضلوا مأنتخين كدا و منتظرينها طول عمرهم والله ما هيلاقوها .
ناس كتير بتبص للنص الفاضى اللى فى الكوباية وتتوهم ياعينى بيها … مع ان النص المليان اللى فى اديهم اكتر بكتير من اللى اتشاف بعنيها .
ناس كتير بتفضل تجرى تجرى وتدور عليها … مع انهم لو وقفوا وتأملوا لحظة حواليهم هيلاقوها .
ناس كتير صنفتها ماديًا … مع ان معنى السعادة كلها حسيًا ووجدانيًا .
ناس كتير افتكرت انهم ممكن يشتروها … مع ان لو ادوها لغيرهم ونشروها هترجعلهم بجمال يفرح قلوبهم من غير ما يشحتوها .
ناس كتير افتكرت سعادتها مربوطة بعبد من العباد علشان يحسسهم بيها … مع ان رب العباد موجود ولو طلبوها منه مفيش اسهل من انه يكرمهم بيها .
ناس كتير ظلمتها بكلامهم وهمشتها وعمت عنيها عن حلاوتها … مع ان ربنا اداك كل حاجه حلوه و اسباب كتير لسعادتها .
لما تنوى سيادتك تدور عليها مش هتلاقيها…. انما لما تحسها بقلبك وتحط فى دماغك انها ملكك هتفرح اوى بيها .
